Бүгін – той. Тойыңыз торқалы болсын, қазақ елі!

Кейде 11 жыл бойы білім беріп, балалық қызығыңның куәсі болған мектебіңді сағынасың. Барып, мауқыңды басып, сол күндерді еске алуға жұмысбастылық бет бұрғыза бермейді. Есесіне сайлау болатын күні қызмет бабымен бір мезгіл, кейде кешке дейін Жанқожа батыр атындағы №70 мектепке барып, ұстаздарыммен қауышып, шүйркелесіп қайтамын. Бұл да бір ерекше сезім.

1919 жылы іргетасы қаланған тарихи ғимаратта №57 сайлау учаскесі орналасқан. Адам қарасы қалың. Арасынан жетпістің жетесіне шыққан Нарымбетов Нағашыбай көкемізді көз танып қалды. Айтуынша, биылғы кандидаттар көңілге сенім ұялатады. Сол себепті ақсақал күн көтерілмей жатып таңдау жасауға келіпті. Сайлау учаскесінің төрағасы Төребай ағамыз ел келешегі үшін ат арытып келген ақсақалға алғыс білдірді. Көненің ізімен арқасына шапан жапты.