Емделіп жатқандар елеусіз қалмады
Еліміз үшін маңызы бөлек ҚР Президентін сайлау процесі әлі де қызу жүріп жатыр. Бұл күні денсаулық жағдайына байланысты таңдау жасауға өз аяғымен келе алмаған жандардың қарасы қалың. Басы ауырып, балтыры сыздаған жерлестерді науқаннан тыс қалдыру бәрінен бұрын азаматтыққа сын. Бұл алдымен Е.Бозғұлов атындағы №249 мектеп-лицейде ұйымдастырылған №60 сайлау үйінің төрағасы Батырбек Танирбергеновтың ойына келді десек қателеспейміз.Жаңа ғана аталған сайлау учаскесінің мүшелері Қазалы ауданаралық ауруханасына барып, дауыс беруге тілек білдірген қауымға қызмет көрсетіп қайтты. Сөздеріне сенсек, 166 адам келешек үшін таңдау жасаған. Көптің ықыласы учаске мамандарының да көңілін көтеріп тастағанға ұқсайды. Елдің ауызбірлігі сайлау тұсында да көрінетіні көңілге жылы тиеді екен.
#Қазақелі #сайлау #Президент #20қараша
