Теңгенің нығаюының нақты себебі белгілі болды
Ұлттық Банк валюталық интервенциялар жүргізген жоқ. Бұл туралы Үкімет отырысына Ұлттық банк төрағасы Ғалымжан Пірматов мәлім етті, деп жазады inbusiness.kz.Биыл жыл басынан бастап ақпан айының соңына дейін теңгенің долларға қатысты бағамы 1 доллар үшін 445,66 теңгеге дейін 3,7%-ға нығайды.
Алайда Ұлттық Банк валюталық интервенциялар жүргізбеген.
"Қаңтар-ақпан айларында квазимемлекеттік сектор субъектілерінің 748 млн доллар сомасына валюталық түсімді сатуы және Ұлттық қордан республикалық бюджетке трансферттерді қамтамасыз ету үшін 818 млн доллар мөлшерінде валюта сату теңгеге қолдау көрсетті", – деп түсіндірді ҰБ төрағасы.
Оның айтуынша, қысқа мерзімді перспективада теңге динамикасы геосаяси жағдайға, нарықтың ішкі қатысушыларының күтулеріне және әлемдік нарықтардағы жағдайға байланысты болады.
"Ұлттық Банк дисбаланстардың жинақталуын болдырмайтын және алтын-валюта резервтерінің сақталуын қамтамасыз ететін икемді бағам белгілеу режимін ұстанады", – деп атап өтті Ғалымжан Пірматов.
