Бұл туралы ҚР Премьер-Министрі Әлихан Смайылов Сенат депутаттарының сауалына жолдаған жауабында айтты.

«Бүгінгі таңда дизель отынының бағасына көрші елдермен айтарлықтай диспаритеті байқалады. Мысалы, Қазақстанда орташа баға 235-250 теңге/литр, ал Ресейде 370-380 теңге/литр, Өзбекстанда 515-520 теңге/литр, Қырғызстанда 400-410 теңге/литр құрайды. Көрсетілген баға айырмасы мұнай өнімдерін шекара маңындағы елдерге әкетілуіне алып келді және ішкі нарықтағы маусымдық отын тапшылығының факторларының бірі болып табылады. Осыған байланысты Үкімет ішкі нарықты қамтамасыз ету және жанар-жағармай экспортының заңсыз схемаларын жою жөнінде жүйелі шаралар қабылдауда», - делінген жауапта.

Үкімет басшысы қазір ел аумағынан мұнай өнімдерінің жекелеген түрлерін автокөлікпен алып шығуға тыйым бар екенін еске салады.

«Сондай-ақ ресурс ұстаушылардың отынды өткізуін бақылау күшейтілді. «ҚазМұнайГаз» ҰК» АҚ мен «Petrosun» ЖШС-ның мұнай өнімдерін ауыл шаруашылығы тауарларын өндірушілерге, жанармай құю станциялары бөлшек сауда желілеріне және коммуналдық кәсіпорындарға басымдықпен бөлуі белгіленді. Биылғы бірінші тоқсанда жергілікті атқарушы органдардың электрондық базасында өңірлік жанармай құю станциялары желілерімен бірлесіп мұнай өнімдерінің жекелеген түрлерін есепке алу жүйесі іске қосылады, бұл жанар жағар май өткізуді толық бақылауға мүмкіндік береді», - деп жазады Әлихан Смайылов.