«Агро-Өркен» жауапкершілігі шектеулі серіктестігінің Қожабақы ауылындағы егін алқаптарында егінге алғашқы орақ түсті.

Егінге алғаш орақ түспестен бұрын аудандық ауыл шаруашылығы бөлімінің басшысы Нұрлан Аманбай арнайы дайындалған стенд бойынша ауданның егіншілік саласының көрсеткіштері мен атқарылып жатқан жұмыстар туралы мәліметтермен таныстырды.

Ал «Агро Өркен» ЖШС басшысы ­Медеу Есқожаев шаруашылықтың егіс орағына дайындығы барысы туралы айтып өтті.

Серіктестік директоры биылғы жылы 600 гектар жерге күріш дақылын сепкенін айтты. Оның 70 гектары «Лидер», 530 гектары «Янтарь» деген күріш сорттары.

Одан бөлек, 130 гектар жерге бидай, 316 гектар жаңа жоңышқа, 516 гектарға ескі жоңышқа егілген.

Аудан әкімі Мұхтар Оразбаев диқандарды алғашқы егін орағымен құттықтаған соң Қожабақы ауылының тұрғыны, 2 мәрте «Еңбек Қызыл Ту» орденінің иегері Қуаңбай Рахметов батасын берді.

Мұнан соң егін орағының лентасы салтанатты түрде қиылып, «дала кемесі» атанған комбайндар өз жұмыстарын бастады.

Айта кетейік, Қазалы ауданы бойынша биыл 17 402 гектар жерге ауыл шаруашылығы дақылдары орналастырылды. Негізгі дақыл күріштің көлемі – 6361 гектар. Бүгінгі таңда аудан бойынша күріш орағына қатысатын 42 комбайн, 29 жатка, 115 трактор, 40 жүк көлігі және 59 трактор тіркемесі толықтай жөндеуден өткізіліп, егіс алқаптарында жұмыс атқаруда.