Парламент палаталарының бірлескен отырысынан кейін БАҚ өкілдері министрден: «Келесі Президент Конституцияға өзгерту енгізе ала ма?» деп сұраған еді.

«Конституцияда Конституцияны «неше рет өзгертуге болады, қашан өзгертуге болады» деген норма жоқ. Ол қоғамның дамуына байланысты. Сондықтан, әрине өзгерту енгізуге болады», - деп жауап берді Қанат Мусин.

Сонымен қатар ол келесі Мемлекет басшысы президенттік мандатының мерзімін және бір рет қана сайлану құқығына қатысты норманы өзгерте алмайтынын баса айтты.

Айта кетейік, бүгін депутаттар «Қазақстан Республикасының Конституциясына өзгерістер мен толықтыру енгізу туралы» ҚР Заңын қабылдады.

Оған сәйкес, Президенттің мандаты қайта сайлану мүмкіндігінсіз бір мерзімге шектеліп, жеті жыл мерзімге ұзартылады; Нұр-Сұлтан қаласының атауы қайтадан Астана болып өзгереді; Конституциялық Сот судьяларының өкілеттік мерзімі 8 жылға дейін ұлғайтылады.