Қос бекет іске қосылды
Көліктердің көп бөлігі «көгілдір отынға» көшкелі көк аспанды торлайтын будақ бұлттың сирегені рас. Барлығынан бұрын бұған экологтар қуанған болатын. Өйткені ғылыми тұрғыда жанар-жағар майдың жануынан пайда болатын зиянды қалдықтар ауаны ластап, ғаламдық жылынуға алып келетіні бұрыннан айтылатын. Илон Масктың электр қуатымен жүйіткитін көліктері ауданға жеткенше әлі бірнеше онжылдықтың өтіп кететіні түсінікті. Сондықтан әзірге техникалардың газбен жабдықталуы көңілге медеу болып отыр.Соңғы бес жыл бұрын Қазалы ауданында «көгілдір отын» бекеттері саусақпен санарлық еді. Ондағы көліктер кезегі де қалың болатын. Одан бергі уақытта жыл сайын жаңа бекеттер пайдалануға беріліп келеді. Соған сай экологиялық зияны аз отынды қозғалтқышы бар көліктер де елге көптеп келе бастады. Бірер күн ғана бұрын лентасы қиылған «Қызылорда газ» серіктестігінің екі бірдей стационарлы газ құю бекеті аталған мәселені толығымен шешіп берді десек қателеспейміз.
Жаңа игіліктің бірі аудан орталығы Әйтеке би кентінде орналасса, екіншісі Қазалы қаласындағы Ү.Түктібаев көшесінде ашылды. Кенттегі Қ.Пірімов көшесінде орналасқан газ құю бекетінің ашылу салтанаттына аудан әкімінің орынбасары Ғалымжан Еркебай қатысып, жаңа нысанның жұмысына сәттілік тіледі.
Жаңа станцияда автокөліктерге газды тәулік бойы құю қызметі қарастырылған. Бір мезгілде қос көліктің сұранысын қанағаттандыра алады. Сондай-ақ мұнда клиенттерге шағын дүкен қызмет көрсетеді.
Р.ӘБДІҚАЛЫҚ
