Қазалы Қазалы аудандық қоғамдық-саяси газет
» » Ауданда дәрі-дәрмектің екі айлық қоры бар

Ауданда дәрі-дәрмектің екі айлық қоры бар

Рас, аудандағы эпидемиологиялық ахуал тұрақталды. Ел үрейін тудырған індет іркілді. Десек те тұрғындар әлі де «коронавирустың екінші толқыны келеді» деген үрейде. Бір жағынан аудандағы сақтық шаралары мен жұқпалы дерттің алдын жұмыстары тоқтаған жоқ.
Сәрсенбі күні аудан әкімінің орынбасары Әліби Әбиев Қазалы ауданаралық ауруханасы мен теміржол ауруханасына барып, медициналық мекеменің дайындық жұмыстарымен ­танысты.
Дайындықты пысықтауға келген аудан әкімінің орынбасарына Қазалы ауданаралық ауруханасының бас дәрігері Бақыткүл Әлішева мен «Қазалы теміржол ауруханасы» ЖШС-ның бас дәрігері, атқарушы директоры Сейілхан Артықбаев қазіргі таңдағы эпидемиологиялық ахуал жайында толық мәлімет беріп, атқарылған жұмыстармен бөлісті. Сондай-ақ қазіргі таңда жергілікті ауруханаларда кемі екі айдың дәрілік заттары мен медициналық құрал-жабдықтардың қоры жеткілікті екені айтылды.
Осыдан соң Әліби Берікұлы аудан орталығындағы ең ірі дәріхананың бірі – «Nur.Меd.kz» медицина орталығында болып, бүгінгі сатылымда бар дәрілік заттардың мөлшерімен танысты.
– Қазір дәріханада ұзын-сонар кезек жоқ. Сақтық шаралары да қатаң бақылауда. Арақашықтықты сақтап, ішке үш адамнан артық кірмейді. Сөрелерде елімізден бөлек, алыс-жақын шетелдерден жеткізілген емдік препараттар толып тұр. Бастысы, елдің амандығы болғандықтан, ендігі жолы тұрғындар тарапынан дәріханаларға шағым түспес үшін, дәрі тапшылығын болдырмау бағытында аянбай жұмыс жасап жатырмыз, – дейді жеке кәсіпкер Айнұр Тұрымбетова.
Бүгінге дейін «екінші толқынға дайындық қалай?» деп Қазалы ауданаралық ауруханасындағы дайындық жұмыстарын зерттеп, ондағы атқарылып жатқан жұмыстармен танысып, газет бетіне жарияладық. Одан бөлек сақтық шаралары мен аурудың алдын алу мақсатында өткізілген біршама шараларға қанық болып келеміз. Мұның өзі бірінші толқындағы кеткен қателіктің алдын алуға үлкен септігін тигізері сөзсіз.

А.БАҚЫТҰЛЫ
21 қараша 2020 ж. 86 0

Жаңалықтар мұрағаты

«    Қараша 2020    »
ДсСсСрБсЖмСбЖс
 1
2345678
9101112131415
16171819202122
23242526272829
30