Криштиану Роналду жас жанкүйерлерімен әңгімелесті. «Реалдық» шабуылшы аталған әңгіме барысында Мессидің нашар футболшы екенін тілге тиек етті, деп хабарлайды Baq.kz ақпарат агенттігі korrespondent.net сайтына сілтеме жасап.

Испания чемпионаты 20-турының аясында Депортивоға қарсы ойнайтын матчтың алдында Роналду өзін алаңға алып шыққан жас жанкүйерімен әңгімелесті.

Жас жанкүйер Роналдуға «Сен мен үшін әлемдегі үздік футболшысың, ал Месси...» деп ойланып тұрып қалады. Баланың сөзін Роналду өзі аяқтап, «Ал Месси – нашар футболшы» дейді.

Басылымның хабарлауынша, бұл әңгімеге тағы бір жанкүйер қосылып, ол да Мессидің футболды нашар ойнайтынын айтқан.

Естеріңізге сала кетсек, «Реал» Депортивоны 7:1 есебімен жеңіп, Испания чемпионаты турнирінің кестесінде төртінші орынға жайғасқан болатын. Аталған кестеде бірінші орында Барселона тұр.