Ұлттық ойындардың VІІ спартакиадасы басталды
Аудандық білім бөлімінің ұйымдастыруымен Е.Бозғұлов атындағы №249 мектеп-лицейде мектеп оқушылары арасында ұлттық спорт ойындарын дамыту, жас жеткіншектерді дене тәрбиесі және ұлттық спорт түрлерімен тұрақты шұғылдануға шақыруды мақсат еткен ұлттық ойындардың VІІ спартакиадасы бастау алды.
Қазалы ауданының 95 жылдығына арналған жиынның ашылу салтанатына Қазалы ауданы әкімінің орынбасары Дәурен Тілеуімбетов пен ауданның бас ұстазы Әділхан Жөлекешов арнайы қатысып, жарысқа қатысушыларға сәттілік тіледі.
Мектеп оқушылары арасында аудандық ұлттық ойындарының VІІ спартакиадасы екі кезеңге жоспарланған. Доданың алғашқы кезеңінде аймақтық іріктеу жүргізіліп, 8 аймақта 17-18 қараша күндері өтті. Оған 35 мектептен 1050-ге жуық оқушы қатысты.
Ал 23-25 қараша күндері аудандық кезеңге 30 мектеп спорттың 12 түрі бойынша жеңіске ұмтылады. Бүгін асық ату, бес асық, ләңгі және тоғызқұмалақ спорт түрлері бойынша оқушылар бақ сынауды басталды.
