А.Садықов 77 келіге дейінгі салмақта күреспей-ақ жүлдегерлер қатарына ілікті.

Оның қарсыласы, камбоджалық Кео Сопхак жарақатына байланысты кілемге шыққан жоқ.

Тағы бір қазақстандық Мақсат Сайлау 87 келіге дейінгі салмақта қола жүлде үшін бәсекеде жапониялық Масато Сумимен күресіп, қарсыласына еш амал қыла алмады – 1:9.

Осылайша, байрақты бәсекені бастаған қазақстандық балуандар алғашқы күні бір күміс, бір қола жүлдеге қол жеткізді. Ертең грек-рим күресінен екі салмақта жеңімпаз-жүлдегерлер анықталады. Содан кейін әйелдер күресіне кезек тиеді.

6 қазан күні жарысты еркін күрес шеберлері қорытындылайды.

Бокс бәсекесінде қазақстандық Наталья Богданова жартылай финалда 66 келіге дейінгі салмақта таиландтық Суваннафенг Джанджаймен қолғап түйістіріп, үш рет нокдаун алып, нокаутпен жеңіліп қалды.

Сөйтіп ол финалдан тыс қалып, қола жүлдені қанағат тұтты.

Қазақстаннан бокс финалында Қамшыбек Қоңқабаев пен Карина Ибрагимова ғана өнер көрсетеді.

Еске сала кетейік, бұдан бұрын боксшы Карина Ибрагимованың финалға шыққанын жазған едік.

Сондай-ақ Мейіржан Шермаханбет Азиада финалында жеңіліп, күміс жүлдені қанағат тұтты.