Қазақстандық B-Boy Amir (Әмір Зәкіров) 6 қараша күні Нью-Йоркте өтетін Red Bull BC One брейкингтен чемпионаты промовидеосына түсті, деп хабарлайды ұлттық олимпиадалық комитет.

"Режиссура – менің екінші махаббатым. Біріншісі – брейкинг. Өзің жақсы көретін екі жұмысты бірге істеуден артық ештеңе жоқ екен. Бүкіл әлемге біздің мәдениетіміз туралы, өзімнің туып-өскен жерім туралы айтқым келді, бірақ соны заманауи түрде, әдеттегіден өзгеше жолмен жеткізуді ойладым. Қазір әлемдік брейкинг аренасы Қазақстанға қатты назар аударып отыр. Біздің оларға көрсететін дүниеміз баршылық", - дейді B-BoyAmir.

Түсірілім жұмыстары бастан-аяқ Алматыда жүргізілген. Ол қазақстандық Qara Studios продакшн-компаниясының өнімі. Бұл промода ұлттық танымал атрибуттардың бәрі бар.

"Біздің ниетіміз – қазақ мәдениетін өзіміз қабылдап үйренбеген қырынан көрсету болды. Әмір басынан-ақ, видеоның бәрін табиғи күйінде түсіруді жоспарлады", – дейді қоюшы-режиссер NurNiyaz.

Жобаның қоюшы-режиссері промо-видеоны түсіріп болғаннан кейін, брейкингтің философиясын жете түсінгенін мойындады.

Айта кетері, Әмір Зәкіров – брейкингтен қазіргі чемпион ғана емес, осы спорт түрі бойынша, ҚР ұлттық олимпиадалық құрама командасының мүшесі. Әмір 6 қараша күні, Нью-Йорк қаласында өтетін Red Bull BC One әлемдік чемпионатында Қазақстанның намысын қорғайды.

Халықаралық олимпиада комитеті 2020 жылы брейкингті ресми түрде, олимпидалық спорт түрлерінің тізіміне енгізді. Ол Парижде өтетін Олимпиада-2024 ойынына кіргізіледі.