Өткен аптада облыстық білім басқармасының аймақтық дене тәрбиесі методикалық орталығының ұйымдастыруымен 9-11 сынып оқушылары арасында баскетболдан «Алтын доп», волейболдан 7-8 класс оқушылары өнер көрсеткен «Шұбар доп» және 5-6 сынып балалары бақ сынаған гандболдан «Ұшқыр доп» үшін іріктеу жарысы өтті. Қорытындысы бойынша облыстық деңгейдегі «Алтын допты» Жамбыл Жабаев атындағы №234 мектептің ер балалары иемденіп, бірінші орынды қанжығаға басты.

№91 мектептің жас жігіттері де «Ұшқыр доптың» жеңімпазы атанып, осы сайыстан №249 мектеп-лицейдің қызғалдақтарынан құралған командасы бірінші орын мінберінен көрінді. Ал волейболдан өткен «Шұбар доп» сайысында №94 мектеп командасы үшінші орынды місе тұтты. Көп ұзамай облыстық жарыста жеңімпаз атанған мектеп командалары республикалық «Ұлттық мектеп лигасына» аттанатын болады.

Айта кетейік, бұған дейін 7-8 сынып оқушылары арасында гандболдан өткен “Ұлттық мектеп лигасы” аясындағы республикалық жарыс мәресіне жеткен еді. Нәтижесінде облыс намысын қорғаған Ғани Мұратбаев ауылындағы №91 орта мектеп оқушыларынан құралған команда екінші орын иеленіп, күміс алқа тақты. Жас спортшылар мұндай нәтижеге жетекшісі, дене тәрбиесі пәнінің мұғалімі Д.Бақытбергеновтің жаттықтыруымен жетті.