Мерейлі міндет жүктейді
Жастардың болашақта үш тілді еркін меңгеруіне жағдай жасау – қазақстандықтардың кез келген елде еркін жұмыс істеуіне арналған мүмкіндік екені белгілі. Болашақ ұрпағымыз қажетті деңгейдегі үш тілді білу арқылы өзге елдердің іс-тәжірибелерін зерттеп, салыстыра жұмыс жасауға жол ашады. Елбасының жастарға салмақты үміт артуы еліміздің экономикасын дамытуға үлес қосатын жас дарындардың қалыптасуына үлкен септігін тигізеді. Бұл – үлкен мақсатқа жетудің алғы шарттарының бірі.Ел Президентінің «Егер біз қазақ тілі ғұмырлы болсын десек, оны жөнсіз терминологиямен қиындатпай, қазіргі заманға лайықтауымыз қажет» деп атап көрсеткен пікірі қазіргі кездегі кейбір орынсыз аударылған балама терминдердің өміршең емес екендігін көрсетеді. Яғни қазақ терминологиясын халықаралық деңгейге лайықтау тәсілдерін қайта қарастыру терминологиялық комиссияларға үлкен міндет жүктейді. Осы тұстан қарастырғанда латын әліпбиіне көшу мәселесі білім және ғылым саласындағы көптеген түйткілдерді шешетіні сөзсіз. Жақында Президент Жарлығымен латын графикасына негізделген қазақ тілінің жаңа әліпбиі бекітілді. Латын таңбасына көшуге жан-жақты қолдау көрсету, білім беру саласы қызметкерлеріне, оның ішінде қазақ тілі мамандарына үлкен міндет жүктейді. Себебі жас ұрпақтың толыққанды білім алуы мен құзыреттілігі қалыптасқан тұлғаға айналуы мұғалімнің шеберлігіне, кәсіби біліктілігіне, жан-жақты ізденімпаздығына және шығармашылығына тікелей байланысты. Ұлттың әлеуетін арттыру, еліміздің мәдениеті мен тілін дамыту жас ұрпақты тәрбиелеуден бастау алатыны сөзсіз.
Райхан CАДУАХАС,
№70 мектептің мұғалімі.
