Ауылдастардың аялы алақаны

Қайырымдылық – асыл қасиет. Халқымызда бұрынғы өткен ата-бабаларымыз қысылғанда бір-біріне қол ұшын беріп, жоқ-жұқа жандарға демеу көрсетіп отырған. Осындай үрдіс ізін жаңғыртуға арналған «Сыр жомарты» қайырымдылық айлығы Ү.Түктібаев ауылдық клубында жалғасын тапты.

Бұл маңызды шара үстінде жүректері мейірім шуағына бөленген бірқатар жомарт жүректі жандар қамқорлыққа зәру отбасыларына қолдан келген қамқорлықтарын жасады. Солардың қатарында «Орынбет ишан» мешітінің имамы Ғабдулла Ізәт бір отбасыға қаржылай сый-сияпатын жасады. Бұдан кейін осы ауылдың тумалары, қазіргі күні бірі Алматы қаласында, екіншісі Жамбыл облысының Меркі ауданында тұратын Берік Әбдіқалықов пен Сабыржан Мырзағұлов жеті отбасыға қаржылай көмектерін ұсынды.

Кең пейілділік танытып жерлестеріне аялы алақанын созған азаматтарға ауыл әкімі Абдулла Төлемісов бүкіл тұрғындар атынан шынайы алғысын білдірді.