Еліміздің солтүстігі, орталығы мен шығысына циклон және сонымен байланысты атмосфералық тұтас бұлттар әсер етіп, салдарынан жауын-шашын болады. Күн күркіреп, күшті жел соғады, солтүстікте бұршақ жаууы мүмкін. Қазақстанның батысында, оңтүстігі мен оңтүстік-шығысында күн ашық болады, деп хабарлайды Baq.kz ақпарат агенттігі Қазгидрометке сілтеме жасап.

  Ақмола және Қарағанды облыстарының кей жерлерінде жел күшейіп, екпіні 15-20 м/с болады. Күндіз бұршақ жаууы мүмкін.

  Қостанай облысында түнде және күндіз секундына 15-20 метрге дейін жететін қатты жел соғады.

  Солтүстік Қазақстан облысының аумағында түнде және таңертең тұман түсіп, күндіз жел 15-20 м/с дейін күшейеді. Бұршақ жаууы мүмкін.

  Ақтөбе, Павлодар облыстарында және күндіз Жамбыл облысының кей аймақтарында соққан желдің екпіні 15-20 м/с болады.

Қызылорда облысының кей жерлерінде де күндіз жел күшейіп, 15-20 м/с дейін жетіп шаң борайды.

  Қызылорда, Жамбыл, Түркістан, сондай-ақ Ақтөбе, Атырау, Маңғыстау, Батыс Қазақстан және Қарағанды облыстарының кей аймақтарында өрт шығу қаупі жоғары.

Baq.kz