Мас күйде көлік жүргізгенге жаза қатаң
фото: Н.НҰРЖАУБАЙ
Қазалы аудандық сотында Е.-ге қатысты ҚР ӘҚБтК-нің 608-бабының 1-бөлігі бойынша әкімшілік құқық бұзушылық туралы іс қаралды.
Іс құжаттарына сәйкес 2024 жылдың 3 қаңтарында Е. Әйтеке би кентінде, AUDI 80 көлік құралын алкогольдік мас күйінде басқарғаны анықталды.
Сот отырысында Е. құқық бұзушылық жасағандағы кінәсін толығымен мойындап, болған оқиғаны растады. Ол жасаған ісіне өкініп, соттан оны қатаң жазаламауын сұрады.
Сот қаулысымен Е. ӘҚБтК-нің 608-бабының 1-бөлігінде көзделген құқық бұзушылықты жасағаны үшін әкімшілік жауапкершілікке тартылып, оған он бес тәулікке әкімшілік қамаққа алуға және жеті жыл мерзімге көлік құралын басқару құқығынан айыру түріндегі шара тағайындалды.
Сот қаулысы заңды күшіне енбеген.
Қазалы аудандық соты
