Партия бағдарламасы аясында қазалылық 50 отбасы баспаналы болды
Қазалы ауданында «AMANAT»партиясының Сайлауалды бағдарламасы аясында әлеуметтік осал топтағы отбасылар үшін сатып алғанған 50 пәтерлі 25 үй азаматтарға табысталды. Бүгін пәтер кілтін ауданда арнайы жұмыс сапарымен болған облыс әкімі Нұрлыбек Нәлібаев пен партияның облыстық филиалының төрағасы Наурызбай Байқадамов салтанатты түрде табыстады.
Партияның бағдарламасында халықтың әлеуметтік осал топтары үшін республикалық және жергілікті бюджеттен 1000 пәтер сатып алу жоспарланған. Олардың ішінде 600 пәтер Қызылорда қаласында болса, қалғаны аудандарға тиесілі. Осы ретте бүгін Қазалы ауданында 50 отбасы баспаналы болды.
Жаңа баспаналы болған тұрғындарды құттықтаған аймақ басшысы бұл – мемлекеттің тұрғындардың әл-ауқатын жақсартуға бағытталған жұмыстарының жемісі екендігін атап өтті.
Айта кетейік, жақында Шиелі ауданында 70-тен астам, Жаңақорған ауданында 50, кеше Арал ауданында 100 отбасы баспана қуанышына кенелді.
#AMANAT
