Аудандық ауруханада Президенттің кезекті Жолдауы талқыланды
Мемлекет басшысының жолдауында денсаулық саласына байланысты бірқатар мәселелер көтерілген болатын. Осы ретте аманаттық депутаттар осы маңызды құжатты Қазалы ауданарлық ауруханасында ұжымымен бірге талқылап, кездесу өткізді.Іс-шараға облыстық мәслихаттағы «AMANAT» партиясы фракциясының мүшесі, облыстық мәслихат депутаты Ибайдулла Тілеп пен аудандық мәслихат депутаты Күншығар Әбілов қатысты.
Жиында халық қалаулылары Жолдауда Мемлекет басшысы тұрғындардың әлеуметтік әл-ауқатын көтеруде орасан рөл атқаратын әр салаға айрықша назар аудара отырып, еліміздің дамуының негізгі бағыттарын белгілегенін атап көрсетті.
-Президент өз жолдауында әлеуметтік саланы дамыту туралы сөз еткен болатын. Осы орайда елімізде 400-ге жуық мектеп пен 300-ден астам денсаулық сақтау нысаны салынып жатқанын атап өтті. Азаматтардың әл-ауқатын жақсарту бағытында біртіндеп жұмыстар атқарылуда. Бүгінде медициналық нысандардың үшеуі ауданымыздың Абай, Бозкөл және Кәукей ауылдарында салынуда, - деді Ибайдулла Тілепұлы.
Одан соң, сөз алған аудандық мәслихат депутаты Күншығар Әбілов бұл жолғы Жолдаудың ерекшеліктеріне, Мемлекет басшысының күрделі міндеттерді жүзеге асыруға 3 жылға нақты мерзім бекітуінің маңыздылығына тоқталды.
#AMANAT
