Жылу беру маусымына дайындық пысықталды
Жақында аудан әкімі Мұхтар Оразбаевтың төрағалығымен 2023-2024 жылдардағы жылу беру маусымына дайындық жұмыстарын пысықтау жөнінде жиын өтті.Жалпы, аудан көлемінде 165 әлеуметтік-мәдени нысан жылу беру маусымына дайындық жұмыстарын жүргізуде. Ал алдағы жылу маусымына 20,0 мың тонна қатты отын және 2,3 мың тонна сұйық отынға қажеттілік жоспарланып отыр.
Басқосуда аудан басшысы білім, мәдениет және спорт және денсаулық салалары бойынша жылу қазандықтарының дайындығын сұрады. Сондай-ақ, әрбір сала жылу беру маусымына дайындықты күшейтуді тапсырды.
Бұдан бөлек, жауапты бөлім басшыларына жуық арада көмір тасымалдаушылармен кездесу ұйымдастыруды тапсырды.
Маңызды мәселелер жан-жақты талқыланғаннан кейін аудан әкімі аудан әкімінің орынбасарлары, қала, кент және тиісті сала басшыларына нақты тапсырмалар жүктеді.
"ҚАЗАЛЫ" ақпарат
