Қор сарапшылары биыл мамыр айының қорытындысы бойынша жеке тұлғалардың депозиттік портфелінің өзгеру динамикасы тұрақталып, оның жекелеген құрамдас бөліктерінде өсім байқалатынын айтты.

Атап айтқанда, теңгедегі депозиттер бойынша жалпы қалдық мамырда 0,7% өссе, нақты валюталық қалдықтар 0,8% өсті. Бұл ретте биыл мамыр айының соңына қарай жеке тұлғалардың депозиттерінің жалпы көлемінің 0,9% (12,8-ден 12,7 трлн. теңгеге дейін) аздап төмендеуі ұлттық валютаның 4,7% нығаюы әсерінен валютаның қайта бағалануымен байланысты болды (бір доллар мамырдың басында 448,49 теңгеден мамырдың аяғында 427,39 теңгеге дейін).

Қазақстанның депозиттерге кепілдік беру қоры

Өсу қарқыны жылдық негізде де оң нәтиже көрсетті. 2022 жылы 1 маусымдағы жағдай бойынша жеке салымдардың жалпы қалдықтары былтырғы сәйкес кезеңмен салыстырғанда 6,2% өсті. Теңгедегі депозиттер 8,7% өссе, шетел валютасындағы депозиттер 1,7% өсті.

Біз азаматтардың теңгелей ашқан депозиттерінің өсуін байқадық. Бұл сөзсіз нарықтағы жағдайдың тұрақтанғанын, сонымен қатар халықтың ұлттық валютаға деген сенімінің сақталғанын көрсетеді.

ҚФГД төрағасы Әділ Өтембаев

Қор басшысының айтуынша, жеке тұлғалардың депозиттік базасының тұрақтылығының қосымша факторы – мамыр айында 1,8% өскен салымшылар шоттары санының тұрақты ұлғаюы. Ал олардың жылдық өсімі өз деңгейінде 22,2% болды.

Сонымен қатар Әділ Өтембаев халықтың барлық депозиті заңнамада белгіленген өтемнің ең жоғары мөлшері шегінде кепілдікпен қамтылғанын айтты. Бұл ретте қордың жинақтаушы қағидаты бойынша қалыптастырылатын кепілдік өтемақы төлеуге арналған резерві қордың жарғылық капиталының 70%-ын есепке алғанда 944,3 миллиард теңгеге жетті. Оны өтемақы төлеуге де пайдалануға болады.

Жинақталған резерв жеке тұлғалардың депозиттік базасының 7%-дан астамын құрайды, бұл заңмен белгіленген 5%-дық деңгейден жоғары. Бұл көрсеткіш үздік әлемдік тәжірибеге сәйкес келеді және дамыған елдер деңгейінде. Осылайша қазақстандықтардың жинақтары кепілдік өтемақының ең жоғары мөлшері шегінде толықтай қорғалады. шетелдік банктердің еншілес ұйымдарын қоса алғанда, қазақстандық банктердегі депозиттік шоттардың 99,8%-ы толық көлемде кепілдікпен қорғалған.