Аудандық штаб өз жұмысын бастады
Ел Президенті Қасым Жомарт Тоқаев ҚР Конституциясына түзетулер мен өзгерістер енгізу бойынша ағымдағы жылдың 5 маусымында жалпы республикалық референдум өткізу туралы жарлыққа қол қойды. Осы мақсатта «AMANAT» партиясы жанынан ақпараттық-түсіндіру жұмыстарын ұйымдастыру бойынша барлық деңгейлерде штабтар құрылып, бүгіннен бастап аудандық партия филиалы жанындағы штаб өз жұмысын бастады.Осыған сәйкес, бүгін аудандық партия филиалының Атқарушы хатшысы, партия филиалы жанындағы аудандық штаб төрағасы Нұрғиса Жалғасбаев және аудандық мәслихат депутаты, штаб төрағасының орынбасары Ғазиз Әліш алдағы өткізілетін науқанның мән-маңызын халыққа жан-жақты түсіндіру мақсатында «Қазалы орман және жануарлар дүниесін қорғау мекемесі» қызметкерлерімен және «Қазалы» БПҰ мүшелерімен кездесу өткізді.
Кездесу барысында штаб мүшелері бірқатар баяндамалар жасап, алдағы референдумды өткізуді толық қолдап, аса жауапты кезеңде саяси оқиғадан тыс қалмай, референдумға бір кісідей қатысуға шақырды.
"ҚАЗАЛЫ" ақпарат
