2019 жылдан бастап 10 бастамашыл топ саяси партияны тіркеуге құжаттар тапсырған. Олардың үшеуі бірінші кезеңнен өтті. Бұл туралы "Екінші республика. ҚР Президентінің өкілеттілігі қалай өзгереді" брифингі барысында Әділет министрі Қанат Мусин мәлім етті.Министр бүгінгі таңда төрт партияның құжаттары қаралып жатқанын жеткізді.

– "Халық дербестігі" партиясы екінші кезеңнен өтіп, растау хабарламасын алды. Олар съезін өткізді. Заң бойынша, құрылтай съезінен кейін 20 000 кандидаттың тізімі ұсынылуы керек. Тіркеу мерзімі заң бойынша тоқтатылды. Партия мүшелерінің заңға сәйкестігі тексерілуде. Үш партия бойынша – жұмыс бірінші кезең деңгейінде жүріп жатыр, яғни партия құру ниеті туралы хабарланғаннан кейін заңға сәйкес бастамашыл топ мүшелері арасында тексеру жүргізілді, олардың саны кемінде 1000 адам болуы тиіс. Олардың арасында ЖСН-ның дұрыс еместігі, тегі, аты, әкесінің аты сәйкес келмеген жағдайлар анықталды. Арасында қайтыс болған азаматтар, сондай-ақ басқа партиялардың мүшелері бар екені белгіленді. Заң бойынша, Қазақстан азаматы бір ғана саяси партияның мүшесі бола алады, тиісінше, басқа партияны құруға қатыса алмайды, – деді министр.

Бірінші кезеңнен өтіп жатқан ұйымдардың сапында "Ел тірегі", "Намыс", "Бәйтерек" партияларын құру бойынша бастамашылар бар.

Министр атаған тіркелмеген 4 партияның ішінде тек екеуінің басшысы туралы ақпарат белгілі. Тіркелмеген "Ел тірегі" партиясына экс-нұротандық экс-депутат Нұржан Әлтаев, Намыс тіркелмеген партиясына саясаттанушы Санжар Боқаев жетекшілік етеді.

Ал "Халық дербестігі" және "Бәйтерек" партиялары туралы баспасөз беттерінде ақпарат жоқ.