Жалпы имандылық үйінің құрылысы 2021 жылдың қаңтар айында бастау алған. Қазақстан діни басқармасынан рұқсат алынып, жергілікті азаматтардан ұйымдастырушы топ құрылды. Жер көлемі 25 гектар аумақты алып жатқан руханият үйінің ауласына, 3 ғимарат орналасады. 700 орындық мешіт, 200-300 орындық асхана және 10-20 орындық дәретхана салынады.

Игі іс барысында көмек қолын созған бірқатар азаматтар да баршылық. Су жүйесін жүргізуге көмек еткен Арал-Сарбұлақ топтық су құбырын пайдаланушы, Қазалы өндірістік бөлімшесінің басшысы Әділхан Ахметов және жарықтандыру жұмыстарына Қазалы аудандық мәслихат депутаты Ерболат Мұқашовтың еңбегін атап өткен орынды.

Қазақстанның түкпір-түкпірінен көмек қолын созушылар үзілер емес. Қазіргі таңда жалпы жиналған қаражат 13 миллионға жеткен, 7 миллион теңге көлемінде материалдық көмектер берілуде.

– Туған ауылдың өсіп-өркендеп, мәртебесінің биіктей түсуіне үлес қосуды мақсат еткен ауыл тұрғындары ғибадатхана құрылысының жұмыстарын бастаған болатын. Мешіт келер жылы толығымен пайдалануға беріледі. «Мешіт салған, оған ықылас-пейілмен қатысқан адамға, Алла да жақындай түседі, мейірім шапағатын молынан төгеді» дейді қасиетті хадисте. Сауапты іске шынайы ниет танытып, көмек қолын созған барша ағайынға, ел азаматтарына алғысымыз шексіз, – дейді ілкімді бастама жайында ұйымдастырушы топ мүшесі Руслан Әбдіқалықов.

Алдағы уақытта халыққа рухани тәлім-тәрбие беретін қасиетті орын елдің игілігі мен бірлігі үшін дінімізді насихаттайтын имандылық ордасына айналатын болады. Ұлы Абай айтқандай: «Алланың өзі де рас, сөзі де рас». Мешіт салу – жаратушыға шын иман келтіргеннің ғана қолынан келеді. Ол адамның жүрегіндегі имандылықты көрсетеді.