Қазақстанда 5 қаңтардан бастап жаңа шектеулер енгізіледі
5 қаңтардан бастап COVID-19 инфекциясының таралуының алдын алу бойынша қосымша шаралар шеңберінде жекелеген нысандар қызметіне енгізілетін жаңа шектеулер күшіне енеді, - деп хабарлайды Tengrinews.kz."Қазақстан Республикасының бас мемлекеттік санитария дәрігерінің қаулысымен жұмыс және демалыс күндерінде сауда және ойын-сауық орталықтарына, сауда үйлеріне, сауда желілеріне (азық-түлік емес), сауда желілеріне (сауда алаңы 6000 шаршы метрден астам), караокеге кіруге жұмыс режимі шектелмей, қызметкерлер мен келушілерде қауіпсіз "жасыл" мәртебе (вакцинация, сынама алынған сәттен бастап 7 күннен аспайтын теріс нәтижесі бар ПТР сынамасы, тұрақты медициналық қарсы көрсетілімдері бар, кейінгі 3 ай ішінде ауырып сауыққандар) болған жағдайда рұқсат етіледі", - делінген хабарламада.
Қабылданған шаралар омикрон штамының таралу және жұғу жылдамдығына негізделген, ол қазірдің өзінде әлемнің 110 елінде анықталды, ал 30 қарашада ол небәрі 10 елде анықталған болатын.
Айта кетейік, коронавирустың бұл түрінің жұқпалылығы дельта штамына қарағанда 5 есе жоғары, қайта жұқтыру қаупі де бар. Дүниежүзілік денсаулық сақтау ұйымының болжамы бойынша ауру бірнеше ай ішінде бүкіл әлемге таралуы мүмкін.
