Сәуір айы жауын-шашынды болады

Алдағы сәуір айы жылы әрі жауын-шашынды болады. Бұл жөнінде бүгін Орталық коммуникациялар қызметінде өткен брифинг барысында «Қазгидромет» АҚ Ұзақ мерзімге ауа райын болжау басқармасының басшысы Гүлмира Ақышева мәлімдеді, деп хабарлайды Baq.kz ақпарат тілшісі.

«Ауа райының ұзақ мерзімге болжамы бойынша, алдағы сәуір айы жылы, жауын-шашынды болады. Әсіресе, бұл айдың бірінші және үшінші онкүндігінде жиі байқалады. Сәуір айында, сондай-ақ, жылы күндер мен суық күндер алма-кезек ауысатынына байланысты құбылмалы күн райы күтілуде. Бұл кезде ең төменгі температуралар бірінші онкүндіктің соңына қарай байқалады. Бұл кезде еліміздің солтүстік өңірлерінде ауаның түнгі температурасы 5-15 градус аязға дейін төмендесе, күндіз 0-5 аязға дейін төмендейді. Ал еліміздің оңтүстік бөлігінде ауа температурасы 0-5 градус жылы болады», - деді ол.

«Бұл кезде ауаның күндізгі температурасы солтүстік аймақтарда күндіз 15-23 градусқа дейін жоғарыласа, оңтүстік өңірлерде тіпті 20-25 градусқа дейін жетеді. Бірақ, сәуір айында ауа райы әлі де алдамшы болғандықтан, мұндай жылы күндер ұзаққа созылмайды. Өйткені, үшінші онкүндіктің басында және соңына қарай күн райы суыта түседі де, еліміздің солтүстік аймақтарында жауынды ауа райы орын алып, ауа температурасы нөлден төмен болады. Ал оңтүстік өңірлерде өткінші жауын жауып, найзағай күркірейді. Ауаның түнгі температурасы 5-10 градус жылы болады», - деді басқарма басшысы.