Қазақстанда халыққа жаппай салынып жатқан вакциналар әр мемлекетте өндірілгенмен, олардың бір-бірінен түбегейлі айырмашылығы жоқ. Кез келген вакцина иммунитетті қалыптастыруға бағытталған. Ал жансақтау бөлімінде жатқандардың 98% вакцина алмаған адамдар.
Алматының инфекциялық стационарларында 3 943 адам коронавирус жұқтырып, ем алып жатыр. Науқастардың 98% екпе алмаған. Реанимация бөлімшелерінде 267 науқас жатса, ӨЖЖ аппаратына 28 адам, инвазивті емес ӨЖЖ аппаратына 110 науқас қосылған. Тағы 103 науқас High flow аппаратының көмегімен ем алып жатыр. №5 қалалық емхананың бөлім меңгерушісі Гүлзат Байзахованың сөзінше, қаладағы жағдай ушығып барады. Қазіргі уақытта Алматыда тәулігіне шамамен 1250 адам КВИ жұқтырып жатыр.
«Қауіпті індетті жұқтырғандардың көптігінен науқастарды орналастыру үшін төсек-орын санын көбейтудеміз. Қазірдің өзінде қаланың 3 943 тұрғыны инфекциялық стационарда жатыр. Соның ішінде 215 бала бар. Сонымен қатар, 7 702 науқас мобильді бригада мен телемедицина орталығының күнделікті бақылауында. Себебі, көбісі екпе алмаған және бетперде режимін сақтамаған», – деді бөлім меңгерушісі.
Г.Байзахованың айтуынша, вакцина адамның індет жұқтырмауына 100 пайыз кепілдік бере алмайды. Алайда, жұққан ауру жеңіл түрде өтеді. Вакцинадан өтпеген тұрғындардың иммунитеті вирустың мутациясына көбірек бейім келеді. Егер бұрын инфекциялардың ең көп саны 60 жастан асқан адамдар арасында болса, соңғы аптада дәрігерлер науқастардың ішінде жастар мен балалардың көбейгенін айтты. Бұл жаңа «үнді» штамының пайда болуымен байланысты. Штамның жұғу және инкубациялық кезеңі де қысқа.
«Вакцинадан кейін адамдарда белгілі бір реакция пайда болады. Бұл қалыпты температураның болуы. Сондай-ақ, инъекция орны ауырған кезде жергілікті реакция бар. Адамның вакцинаға реакциясы бар-жоғы иммунитетке байланысты емес. Бұл антидене титріне тәуелді емес. Вакцинаны алғаннан кейін инъекция алаңын үш күн бойы суламау, монша мен саунаға барудан бас тарту, алкоголь ішпеу жеткілікті. Сондай-ақ осы кезеңде физикалық жүктемелерден аулақ болу керек», – деді Г.Байзахова.
Емхана дәрігері Қазақстанда қолданыстағы вакциналардың бір-бірінен түбегейлі айырмашылығы жоқ екенін айтты. Олардың бәрі иммунитетті қалыптастырады.
Алматыда 1 ақпан мен 27 шілде аралығында 690 711 адам вакцина алды. Өткен тәулікте 5 001 қала тұрғыны екпе алды. 60 жастанастан 96 553 адам вакцина алған. Қалада медициналық ұйымдарда, мектептерде, мәдениет, спорт нысандарында, базар мен қаланың СОСО-да 212 вакцина пункттері (250-ге дейін ұлғайту мүмкіндігімен) жұмыс істейді. 1 260 адам жұмылдырылған 308 екпе бригадасы жұмыс жасауда.
«Вакцинаның екі компонентін алғаннан кейін адам бірден вакцина паспортын алады. Себебі деректер электрондық үкімет порталымен байланысты. E-Gov mobile қосымшасындағы «цифрлық құжаттар» бөлімінде қажетті құжатты көруге немесе емханадан анықтама алуға болады», – деп түсіндірді Г.Байзахова.
