Жыл басынан бері 9 мыңға жуық қандас елге оралған
2021 жылдың алғашқы алты айында 8 867 қазақ тарихи отанына оралып, қандас мәртебесін алды деп хабарлайды Azattyq Ruhy Еңбек және халықты әлеуметтік қорғау министрлігіне сілтеме жасап.Биыл Қазақстанға келген қандастардың төрттен үші (75,5%) Өзбекстаннан, 10,4%-ы Қытайдан, 7%-ы Түркіменстаннан, 2,5%-ы Моңғолиядан және 4,5%-ы басқа елдерден қоныс аударған.
Келген этникалық қазақтар негізінен Алматы (29,9%), Түркістан (14,5%), Маңғыстау (18,7%) және Жамбыл (8,0%) облыстарына, сондай-ақ Шымкент қаласына (10,7%) қоныстанды.
Бұл қандастардың 19,2 пайызы зейнеткер болса, еңбекке қабілетті жасқа жетпегендері – 25,3%. Қалғаны түгел еңбек ететін жаста.
Еңбекке қабілетті жастағы қандастардың 10,9% білімі жоғары, 39,3% - орта кәсіби, 45,9% - жалпы орта білімі бар және 3,9% - білімі жоқ.
Айта кетейік, 1991 жылдан бері республикаға 1 миллион 79,2 мың этникалық қазақ оралған.
