Сала мамандарының айтуына қараған­да, облыста қазір жалпы саны 128 той­хана бар. Коронавирус пандемиясына бай­ланысты енгізілген төтенше жағдай мен ка­рантиндік шараларға байланысты бас мемлекеттік санитарлық дәрігер қаулысымен тойханалардың қызметіне тыйым салынған еді. Бұл қауіпті дерттің алдын алу және халықтың қауіпсіздігін қамтамасыз ету үшін қабылданған амал. Дегенмен қызмет етуге тыйым салынған кәсіпкерлік нысандарын қайта жандандыру және басқа салаларға бағыттау мақсатында облыс әкімдігінің «Қызылорда облысының 2023 жылға дейінгі экономикалық даму жос­пары» әзірленген.

«Жоспар аясында 10-нан аса тойхана қыз­метін өзге салаларға бағыттады. Атап айт­қанда, Арал ауданындағы «Ақниет» тойханасы киім-кешек сататын сауда нысанына ай­налды. Ал Қармақшы ауданындағы «Алтын Ғасыр» тойханасы енді отбасыға арналған киімдер сататын сауда орталығы болды. Сол аудандағы «Мәлике Ана» тойханасы енді балалар ойын алаңы мен кондитерлік өнімдер өндіретін цехына ауыстырылды. Қызылорда қаласында орналасқан «Ұлытау» тойханасы шырындар мен сусындар өндірсе, «Oрдa» тойханасы автоматтандырылған лаваш шығару өндірісін іске қосады», – деген мәлімет таратты облыстық Кәсіпкерлік және туризм басқармасы.

Басқарма таратқан мәліметтерге қара­ғанда, бірқатар тойхана иелері нысандарды тіпті құс шаруашылығымен айналысуға бейімдемек ниет танытқан. Сонымен қа­тар медицина орталығы ретінде қайта жаб­дықталған, құрылыс материалдары дүкеніне айналған тойханалар да бар. Мұндай қадамдар коронавирус пандемиясына байланысты енгізілген шектеулер кезінде ша­ғын және орта бизнестің заман талабына қайта бейімделуінің көрінісі болып отыр. Ең бастысы, біраз уақыт тоқтап қалған тойханалар қайтадан табыс таба бастайды. Бірақ ендігі бағыты бөлек болмақ.