Домбыра үйрену сабағын енгізуді ұсынды
Президент Қасым-Жомарт Тоқаев елордадағы “Қазақ елі” алаңына барып, Ұлттық домбыра күніне арналған мерекелік шараны тамашалады. Ел басшысы бұл күні мектеп бағдарламасына домбыра үйрену сабағын енгізу қажет екенін де атап өтті.“Бұл рухани жаңғыру жолының негізгі арқауы. Бүгінде ұлттық аспабымыз күллі әлем мойындаған мәдени құндылыққа айналды. Бұл қазақтың қасиетті қара домбырасына берілген әділ баға. “Өнер – ұлт келбеті” дейді дана халқымыз. Баршамызға ортақ құндылық домбыраны жан-жақты насихаттап, жас ұрпақтың санасына сіңіру өте маңызды.
Домбыра аспабы – қайталанбас асыл дүние. Сондықтан мектепте домбыра үйрену сабақтарын енгізу қажетті әрі дұрыс бастама. Себебі қазіргі жаппай жаһандану уақытында халқымызға тән бірегей құндылықтарды жаңғырта беруіміз керек”, – деді Қасым-Жомарт Кемелұлы.
Домбыра сабақтарын мектептерге енгізу арқылы ұлттық құндылықты жастар санасына сіңіріп, насихаттау өте маңызды деген пікір ұсынған мемлекет басшысының сөзі көпті қанаттандырды.
«ҚАЗАЛЫ» ақпарат
