Қазақстанда тыйымға қарамастан, криптовалюта саудасы қызып барады
Миллионнан астам Қазақстан азаматы биржада криптовалютамен емін-еркін сауда жасап жүр, деп хабарлайды Stan.kz ақпарат агенттігі КТК телеарнасына сілтеме жасап.
Бұл бейресми дерек. Қаржы аударымдарының бұл түріне тыйым салынғанына қарамастан, олардың саны күн сайын арта түсуде.
Цифрлық майнинг нарығындағы осы сынды заңсыздықтарды реттейтін құжат парламент қабырғасында біраздан бері талқыланып жатыр. Мәжілісмендер мақұлдап жіберген заң жобасынан сенаторлар кінәрат тауып, бүгін Төменгі палатадағы әріптестеріне кері қайтарды.
Бүгінге белгілісі, "Астана" халықаралық қаржы орталығының өкілі атап өткендей, елде 8 криптобиржа тіркелген. "Тағы 19-ын тіркеу жоспарда", - дейді Ернұр Рысмағамбетов. Ондағы операциялар көлеңкелі болып есептелетініне қарамастан, миллионға тарта отандасымыз оны жыр демей, белсенді қолдануда. Ал заң бойынша Қазақстанда тек рұқсаты бар майнерлер жұмыс істей алады. Атап өту керек, бүгінде цифрлық майнинг табысы жоғары қызмет түрі болып саналады. Бірақ қазір қазақстандық майнерлер өз күшін шетелдік пулда біріктірді. Осыған байланысты уәкілетті органдар олардың нақты табысын айта алмай отыр.