Байланыста қала береміз, деді Украина президенті. Украина президенті Владимир Зеленский Twitter парақшасында Қазақстан президентімен сөйлескені туралы жазды.
"Тоқаевпен сөйлестік. Аймақтағы қауіпсіздікке қатысты ауыр жағдайды талқыладық. Біз гуманитарлық мәселелер бойынша ынтымақтастық жүргізуге келістік. Байланыста қала береміз", - дейді Зеленский.Айта кетері, бұған дейін Ақорда мемлекет басшысы Қасым-Жомарт Тоқаев Украина президенті Владимир Зеленскиймен телефон арқылы сөйлескенін хабарлады. Оған Украина тарапы бастамашы болды.
"Тараптар Украина төңірегіндегі ахуал бойынша пікір алмасты. Қасым-Жомарт Тоқаев Украинадағы әскери іс-қимылдарды тоқтату және одан әрі болдырмау үшін келіссөз барысында уағдаластыққа қол жеткізудің маңызды екенін айтты", - делінген ресми хабарламада.
Екі елдің басшылары гуманитарлық саладағы ынтымақтастығын одан әрі дамытуға келісті.