Исламдық ипотека
Сурет: Egemen.kz
Тұрғын үй құрылыс жинақтары саласында маманданған Отбасы банк, Қазақстан Құрылысшылар одағы және Ислам қаржысы мен бизнесінің қауымдастығы (AIFB) исламдық қаржы индустриясын дамыту туралы меморандумға қол қойды. Келісімнің мақсаты – шариғат қағидаттарына негізделген исламдық қаржы құралдарын, соның ішінде ипотеканы енгізу, деп хабарлайды aqshamnews.kz
Ынтымақтастық аясында заңнаманы зерттеу және оны Қазақстан Республикасында исламдық ипотеканы іске қосу үшін өзгерту мүмкіндіктері қарастырылмақ. Сонымен қатар, оқыту семинарлары мен зерттеу жұмыстарын жүргізу жоспарлануда. 2025 жылдың өзінде-ақ клиенттерге үйді пайызсыз сатып алу мүмкіндігін беретін механизм жасалады, бұл шариғат талаптарына сәйкес келеді.
Отбасы банк сондай-ақ Малайзиялық CSQlaw Kazakhstan Branch компаниясының филиалымен келісімге қол қойды. Бұл компания банк қызметкерлерін исламдық қаржыландыру және қаржылық құқық негіздеріне оқытумен айналысады. Бұл болашақта осы сегментте сапалы қызмет көрсетуді қамтамасыз етуге мүмкіндік береді.
Бұл бастама діни қағидаттарды ұстанатын азаматтарға тұрғын үй мәселесін шешуге жол ашады.
Айта кетейік, қазіргі таңда Қазақстанда екі исламдық банк жұмыс істейді:
ADCB ислам банкі (тек бизнеске қызмет көрсетеді).
Заман-Банк ислам банкі (жеке тұлғаларға тек «Вакала» өнімін, яғни депозиттің аналогын ұсынады).
Сондай-ақ мемлекеттік секторда да кредитке ұқсас, бірақ исламдық қаржыландыру қағидаттарына негізделген өнімдер бар. Мысалы, «Даму» қоры шағын және орта кәсіпкерлік субъектілерін исламдық қаржыландыру қағидалары бойынша қолдауды ұсынады.
