Республика бойынша 2007 жылдан бері «Бір ел – бір кітап» акциясын өткізу дәстүрге айналып келеді. Биылғы жылы жалпыхалықтық оқуға: Шәкәрім Құдайбердіұлының шығар­малары, Немат Келімбетовтың «Үміт үзгім келмейді» және Бауыржан Момышұлының «Ұшқан ұя» кітаптары таңдап алынды.

Акция аясында аудандық балалар кітапханасында Абай мектебінің дәстүрін жалғастырушы, белгілі гуманист ақын, ойшыл тарихшы, шежіреші, ағартушы-ғұлама Шәкәрім Құдайбердіұлының шығармаларын насихаттауға арналған «Ғибрат алар артына сөз қалдырған» атты поэзия сағаты өткізілді.

Ақынның «Қазақ айнасы», «Қалқаман-Мамыр» және «Еңлік – Кебек» поэмалары, 1912 жылы Семейде кітап болып жарық көрді. Бұдан бөлек «Лейлі – Мәжнүн», «Нартайлақ және Айсұлу», «Қодардың өлімі», «Мұтылғанның өмірі» поэмалары, «Әділ және Мәрия» романы, «Байшешек бақшасы» әңгімелер жинағы бар.

Шәкәрім, сондай-ақ, Хафиздің бірқатар өлеңдерін, А.С.Пушкиннің «Дубровский», «Боран» атты шығармаларын, Л.Н.Толстойдың әңгімелерін, американ жазушысы Гарриэт Бичер Стоудың «Том ағайдың балағаны» романын аударған.

Сондай-ақ, Ш.Құдайбердіұлының «Бұл ән бұрынғы әннен өзгерек», «Жастық туралы», «Анадан алғаш туғанымда» атты әндері нәзік сыршылдығымен баурап, әлі де ортамызда шырқалып жүр.

Кеш барысында Шәкәрім Құдайбер­діұлының шығармашылық жолында әде­биеттің барлық жанрында жемісті еңбек етіп, бай әдеби мұра қалдырғаны туралы балалар кітапханасының меңгерушісі А.Айтжанова мағлұмат берді. Ақын өмірі мен шығармашылығына арналған бейне-баян көрсетіліп, «Сөз зергері – Шәкәрім» атты кітап көрмесі таныстырылды.

№170, 234 мектеп пен №226 мектеп-гимназия кітапханашысы Г.Сералиева, М.Сады­қова, Д.Дабылова ақын шығарма­шылығында адам, қоғам, дін мәселелері өзекті тақырыптар екендігі жөніндегі ойларын ортаға салды. №226 мектеп-гимназия, №234, №170 мектеп оқушылары Ш.Құдайбердіұлының жырларын жатқа оқыды.

Жас оқырмандарға аудандық балалар кітапханасының алғыс хаттары тапсырылды.