Қар, жаңбыр: Қазгидромет ауа райына байланысты ескерту жасады

Синоптиктердің мәліметінше, елдің бірқатар өңірінде тұман, көктайғақ, қатты жел, жаңбыр мен қар аралас жауын-шашын болжанып отыр. Сонымен қатар бірнеше облыста өрт қаупі жоғары және төтенше өрт қаупі сақталады.

Қызылорда облысында түнде солтүстікте 2 градусқа дейін аяз күтіледі, ал өңірдің солтүстігі мен орталығында төтенше өрт қаупі бар.

Атырау, Батыс Қазақстан және Ақмола облыстарында түнде және таңертең тұман түседі. Орал мен Көкшетауда жел екпіні 15-20 м/с-қа дейін жетеді.

Жамбыл және Түркістан облыстарында солтүстік-батыстан соққан желдің екпіні тау асуларында 20 м/с-қа дейін күшейеді. Өңірлерде төтенше өрт қаупі сақталады.

Солтүстік Қазақстан мен Қостанай облыстарында жаңбыр мен қар аралас жауын-шашын жауып, көктайғақ болады. Кей жерлерде тұман түсіп, желдің жылдамдығы 20 м/с-қа дейін жетеді.

Жетісу және Шығыс Қазақстан облыстарында желдің екпіні кей жерлерде 23-28 м/с дейін күшейеді.

Павлодар және Абай облыстарында күндіз желдің жылдамдығы 15-20 м/с-қа дейін жетеді.

Метеорологтар ауа райының мұндай тұрақсыз сипаты жолдарда қозғалыс қиындығын тудырып, кей аймақтарда өрт және төтенше жағдайлар қаупін арттыруы мүмкін екенін ескертеді.