Ғалия Төребекова 24 жыл аудан­дық ауруханада жұмыс істеген. Қолға алған ісіне ыждағаттылықпен қарап, тынымсыз еңбек еткен ол ақ халат киген бірнеше жылдан кейін-ақ аға мейірбике қызметін атқарады. Сонымен бірге қосымша табыс ретінде дәрігерлер халатын тігуді қолға алады. Бұл 2010 жылдардың шамасы болатын. Кәсібін кенже қал­дырмау мақсатында жауапты қызметтен бас тартып, кіші мейір­бике болғанды жөн санайды. Себебі мейірбикеде артық үш күн демалыс бар еді. Бос уақытты тиімді пайдаланған Ғалия ұжымдастарын кәсіптік киім үлгісімен қамтамасыз етіп, перде тоқудың да ілімін алады. Кейінірек бұл жұмыспен біржолата қоштасып, кәсіпке ден қойды. Есесіне, кеше ғана Қ.Пірімов көшесінде бой көтерген «Exclusive» сауда үйінің тұсауын кесті.

Кент келбетін келтіретін айтулы нысанның ашылуына аудан әкімі М.Ергешбаев пен бірқатар бөлім басшылары қатысты. Шеберлер шоғырланған сауда үйінің ашылуымен құттықтап, жұмыстарына сәттілік тілеген аудан басшысы: «Облыс әкімінің қолдауымен былтырдан бастап кіші кәсіпкерлікті қолдау жылы жарияланғанын білесіздер. Бұл нысанды осы қамқорлықтың нәтижесі деп қарасақ болады. Аудан кәсіпкерлері мемлекеттік гранттар мен жеңілдетілген несиелер есебінен 1,6 миллиард теңге қаражат алған. Соның бірі Ғалия Қанатбайқызы мемлекет көмегін сезініп, оған жеке қаржысын қосып, құны 35 миллион теңгені құрайтын ғимарат тұрғызды. Базардағы кішігірім сауда орнынан ісін бастаған оның бұл әрекеті көпшілікке үлгі болуы тиіс. Алдағы уақытта мол табысқа кенеліп, сол арқылы аудан дамуына үлес қоса­тындарыңызға сенім білдіремін», – деді.

Су жаңа сауда үйі бірнеше сауда секторына бөлінген. Мәселен бірінші қабатта орналасқан «Перделер салонында» заманауи стилдегі оның сан түрі бар. Ал екінші қабатында қазақы нақыштағы сәнді көйлектер мен бас киім бұйымдары жасалады. Терезенің сәнін келтіретін үздік жалюзді де осы жерден табасыз. Мұндағы қыз ұзату көйлектері мен сәндікке арналған қолөнер бұйымдары жергілікті халық арасында үздік саналады. Себебі бұған дейін тігін өнерін жетік меңгерген кәсіп иесі тұрақты тұтынушыларын қалыптастырып үлгерген.

«Exclusive» сауда үйінде қазірдің өзінде 8 адам тұрақты жұмыспен қамтылып отыр. Ғалия Қанатбайқызының айтуынша, тапсырыс көлеміне қарай тағы да тігін шеберлерін жұмысқа тартпақ. Сондай-ақ, шеберханаға үздік шетелдік технологиялар әкелу кәсіпкердің алдағы жоспарында бар.

Ринат ӘБДІҚАЛЫҚ