Синоптиктер 23 қыркүйекте елде ауа райы күрт өзгеретінін ескертті
Pixabay.com23 қыркүйекте Қазақстанның бірнеше өңірінде ауа райы қолайсыз болады. Синоптиктер жаңбыр, найзағай, тұман, қатты жел және шаңды дауыл болатынын ескертті. Көптеген облыста өрт қаупі жоғары және төтенше деңгейде сақталады, деп хабарлайды Ulysmedia.kz.
Қай өңірлерде жаңбыр жауып, найзағай ойнайды?
Алматы облысында таңертең және күндіз оңтүстігі мен таулы аудандарында жаңбыр жауып, найзағай ойнайды. Солтүстік-шығыстан соғатын желдің екпіні 15-20 м/с-қа дейін жетуі мүмкін. Алматының таулы аудандарында да осындай ауа райы болжанады.
Жетісу, Жамбыл және Түркістан облыстарының таулы аймақтарында да күндіз жаңбыр жауып, найзағай ойнайды.
Абай облысының батысы, оңтүстігі мен шығысында жауын-шашын түседі, күндіз найзағай ойнауы мүмкін.
Шығыс Қазақстан облысының солтүстігі, оңтүстігі мен шығысында таңертең және күндіз жаңбыр жауып, найзағай ойнайды.
Бірнеше өңірде жел күшейеді
Қарағанды, Ұлытау, Ақтөбе, Маңғыстау және Атырау облыстарында желдің екпіні кей жерлерде 15-18 м/с-қа дейін жетеді.
Алматы, Жетісу, Жамбыл, Қызылорда, Абай және Шығыс Қазақстан облыстарында жел 15-20 м/с-қа дейін күшеюі мүмкін.
Қызылорда облысында шаңды дауыл соғады
23 қыркүйекте күндіз Қызылорда облысының шығысы мен орталығында шаңды дауыл болжанып отыр. Бұл өңірлерде солтүстік-шығыстан соғатын желдің екпіні 15-20 м/с-қа дейін жетеді.
Қай жерде тұман түседі?
Түнде және таңертең Павлодар, Ақмола, Солтүстік Қазақстан және Қостанай облыстарында тұман болады.
Абай және Шығыс Қазақстан облыстарының солтүстігінде де тұман түседі.
Көкшетау, Петропавл және Павлодар қалаларында да тұман.
Өрт қаупі жоғары
Еліміздің көптеген өңірінде табиғи өрт қаупі жоғары деңгейде сақталады.
Қарағанды, Ұлытау, Ақтөбе, Алматы, Маңғыстау, Атырау, Жамбыл, Түркістан, Қызылорда, Абай, Шығыс Қазақстан, Ақмола және Жетісу облыстарының жекелеген аудандарында төтенше өрт қаупі жарияланды.
Сондай-ақ Қарағанды, Жезқазған, Алматы, Қонаев, Атырау, Тараз, Қызылорда, Көкшетау, Шымкент, Түркістан және Талдықорған қалаларында төтенше өрт қаупі сақталады.
Астанада 23 қыркүйекте жоғары өрт қаупі бар.
