“Қара тізім“ және шоттарды бұғаттау: Қазақстанда борышкерлерге қандай қауіп бар?

Егер адам борышы бойынша талаптарды ұзақ уақыт орындамаса, сот орындаушысы оның шоттарын бұғаттап, олар бойынша операцияларды"қара тізімге" енгізе алады. Сондай-ақ қолданылатын құралдардың қатарында мүлікке шектеу қою шарасы бар.

Мәселен, борышкердің қарызы болып, бірақ оны төлейтін ақшасы болмаса, мүлігі тәркіленіп, аукцион арқылы сатылуы мүмкін. Түскен қаражат қарызды өтеуге жұмсалады.

Бұдан бөлек, сот актілерін орындамағаны үшін борышкер жауапқа тартылуы мүмкін. Қарызды ұзақ уақыт төлемеген жағдайда тіпті қылмыстық жауапкершілік те қарастырылған, дейді Дәурен Оңласын.

Егер алимент бойынша берешек екі айдан аса уақыт өтелмесе, сот әкімшілік жаза қолдануы мүмкін: айыппұл, бес тәулікке дейін әкімшілік қамауға алу немесе 20 сағатқа дейін қоғамдық жұмыстарға тарту.

"Егер берешек алты ай бойы өтелмесе, белгілі бір жағдайларда қылмыстық жауапкершілік туындауы мүмкін", – дейді аға сот орындаушысы.

Егер адамның берешекті бірден өтеуге ешқандай мүмкіндігі, сондай-ақ мүлкі де болмаса, бұл оны талаптарды орындаудан босатпайды.

Сот орындаушылары борышкерге жұмысқа орналасуға көмектесе алады. Егер адам ресми түрде жұмыс істесе, берешекті өндіріп алу туралы қаулы жұмыс орнына жіберіледі.

Алиментті жалақыдан өндіріп алу кезінде табыстың 50 пайызы төлемдерге бағытталады: 25 пайызы – ағымдағы алиментке, тағы 25 пайызы – берешекті өтеуге. Қалған 50 пайызы борышкердің өзінде қалады.

Еске салайық: 25 тамыздан бастап Қазақстанда алимент аударудың жаңа тәртібі күшіне енді. Енді балаларды асырауға арналған ақша арнайы банк шотына аударылуы тиіс. Алушы мұндай шот ашып, оның реквизиттерін сот орындаушысына тапсыруы қажет.

Арнайы алимент шотындағы қаражат бұғаттаудан қорғалған. Сонымен қатар мұндай шоттың болмауы борышкерді алимент төлеу міндетінен босатпайды, ал пайда болған берешек есептен шығарылмайды.