WhatsApp-та фото және видео үшін жаңа белгі пайда болады
Фото:depositphotos.comWhatsApp арналар үшін жаңа функцияны енгізе бастады. Енді әкімшілер жасанды интеллект көмегімен жасалған немесе өзгертілген фотосуреттерді, видеоларды және басқа да материалдарды белгілей алады, деп хабарлайды Tengri Life WABetaInfo-ға сілтеме жасап.
Таңбалау қалай жұмыс істейді?
Таңбалау қалай жұмыс істейді?
Компания блогының мәліметінше, материалды жариялау кезінде арна әкімшісіне "ЖИ көмегімен жасалған контент" атты арнайы опцияны таңдау ұсынылады.
Осыдан кейін жарияланымға тиісті белгі қойылады. Материал орналастырылған соң бұл белгіні алып тастау мүмкін емес.
Бұл ретте WhatsApp бұл функцияны қандай да бір нақты сервиспен шектемейді. ChatGPT, Gemini, Meta AI және басқа да платформаларды қоса алғанда, әртүрлі ЖИ құралдарымен жасалған немесе өзгертілген контентті белгілеуге болады.
Яғни, арна әкімшісі жарияланған материалдың генеративті жасанды интеллектке қатысы бар екенін оқырмандарға алдын ала хабарлай алады.
Функция барлығына қашан қолжетімді болады?
Жаңашылдық әзірге біртіндеп таратылып жатыр. Қазіргі уақытта ол Android және iOS жүйелерінде WhatsApp-ты тестілеуге қатысатын пайдаланушылардың бір бөлігіне ғана қолжетімді.
iPhone иелері бұл функцияға TestFlight-тағы қосымшаның бета-нұсқасы арқылы қол жеткізе алады.
Егер арна әкімшісінде бұл мүмкіндік пайда болса, WhatsApp экранның жоғарғы бөлігінде арнайы хабарландыру көрсетеді.
Әзірге компания таңбалаудың барлық пайдаланушыға қашан қолжетімді болатынын және оның барлық елдерде міндетті болатынын хабарлаған жоқ.
Қазақстанда ЖИ-контентті таңбалау мәселесі қалай?
Айта кету керек, Қазақстанда ЖИ көмегімен жасалған контентті таңбалау міндетті саналады. Тиісті ережелер 2026 жылдың басынан бастап күшіне енеді.
Мұндай белгінің болмағаны үшін айыппұлдар қарастырылған:
жеке тұлғалар үшін – 15 АЕК немесе 64 875 теңге;
шағын бизнес және коммерциялық емес ұйымдар үшін – 20 АЕК немесе 86 500 теңге;
орта бизнес үшін – 30 АЕК немесе 129 750 теңге;
ірі бизнес үшін – 100 АЕК немесе 432 500 теңге.
Бірінші айыппұлдан кейін бір жыл ішінде құқық бұзушылық қайталанса, жаза қатая түседі.
Бұл ретте WhatsApp-тың жаңа функциясы мессенджердің барлық ЖИ-контентті автоматты түрде анықтайтынын білдірмейді. Тестілеуден өтіп жатқан мүмкіндіктің сипаттамасында арна әкімшісі материалдың ЖИ көмегімен жасалғанын немесе өзгертілгенін өз бетінше көрсететіні айтылған.
