Грант қалай бөлінеді: министрлік талапкерлердің жиі қоятын сұрақтарына жауап берді
Білім беру гранттарын бөлу – талапкерлер үшін маңызды әрі көп сұрақ туындайтын кезеңдердің бірі.
Фото: canvaКонкурс нәтижелері жарияланғаннан кейін талапкерлер мен ата-аналар арасында гранттарды бөлу тәртібі, талапкер таңдаған басымдықтардың ескерілуі, қысқартылған оқу мерзіміне түсушілердің нәтижелері және жекелеген санаттарға берілетін құқықтарға қатысты сауалдар жиі туындайды, деп жазады inbusiness.kz сайты.
Осыған байланысты ҚР Ғылым және жоғары білім министрлігі Жоғары және жоғары оқу орнынан кейінгі білім комитеті төрағасының орынбасары Жанна Есинбаева білім беру гранттарын беру конкурсының қалай жүзеге асырылатынын және талапкерлердің нәтижелері қандай тәртіппен қалыптасатынын түсіндірді.
Білім беру гранттарын беру конкурсының нәтижелері жарияланғаннан кейін талапкерлер мен ата-аналар арасында шекті балл, грантқа өту балы және балдары бірдей талапкерлерді іріктеу тәртібіне қатысты көптеген сұрақ туындайды. Әсіресе шекті балдың конкурсқа қатысуға қандай мүмкіндік беретіні және нақты өту балының қалай қалыптасатыны жиі сұралады.
Осыған байланысты білім беру гранттарын беру кезінде шекті балдардың маңызы, балдары тең талапкерлерге қатысты қолданылатын артықшылықты құқықтар және конкурстық іріктеу барысында ескерілетін негізгі критерийлерге жеке тоқталған жөн.
Квоталарға қатысты түсіндірме
Конкурс нәтижелері жарияланғаннан кейін квоталарға қатысты сұрақтардың туындауы заңды. Мемлекет азаматтардың жекелеген санаттары үшін білім беру гранттарын бөлуде квоталар қарастырады. Оларға көп балалы отбасылардан шыққан балалар, жетім және ата-анасының қамқорлығынсыз қалған балалар, мүгедектігі бар азаматтар, ауыл жастары және заңнамада белгіленген басқа да санаттар жатады.
Әр квота бойынша талапкерлер арасында жеке конкурс өткізіледі. Сондықтан әр санаттағы өтпелі балдың әртүрлі болуы – грант саны мен конкурсқа қатысушылардың нәтижелеріне байланысты.
Маңыздысы, квота грантты автоматты түрде алуды білдірмейді. Әр квота шеңберінде де конкурс өткізіліп, грант ең жоғары нәтиже көрсеткен талапкерлерге беріледі.
