Қазақстанға аптап ыстықтың жаңа толқыны мен жаңбыр қатар келеді
Фото: pixabayАлдағы үш күнде Қазақстанда ауа райы күрт құбылады. Ел аумағында найзағай ойнап, өткінші жаңбыр жауады. Ал оңтүстік өңірлерге ауа температурасы +44°C-қа дейін жететін аптап ыстықтың жаңа толқыны жақындап келеді, деп хабарлайды Zakon.kz.
Бұл туралы "Қазгидромет" РМК баспасөз қызметі ұсынған 2026 жылғы 28-30 шілдеге арналған ауа райы болжамында айтылған.
"Атмосфералық фронттардың әсерінен Қазақстан аумағында найзағай ойнап, өткінші жаңбыр жауады, жел күшейіп, бұршақ түсуі мүмкін. Шығыс Қазақстан облысында нөсер жаңбыр болжанады", – делінген хабарламада.
Тек республиканың оңтүстігінде Иран аумағынан келетін құрғақ ауа массаларының ықпалымен жауын-шашынсыз ауа райы сақталады.
"Ауа температурасына келсек, Қазақстанның батыс өңірлерін қоспағанда, ел аумағының басым бөлігінде күн біртіндеп ысиды", – деп хабарлады "Қазгидромет" РМК баспасөз қызметі.
Болжам бойынша күндіз ауа температурасы:
- республиканың солтүстік жартысында +30...+38°C-қа;
- оңтүстік жартысында +33...+44°C-қа дейін көтеріледі.
Бұған дейін "Қазгидромет" 2026 жылғы 27 шілдеге арналған дауылды ескерту жариялаған еді. Синоптиктер Алматы, Шымкент қалалары мен Қазақстанның барлық 17 облысында қауіпті ауа райы құбылыстары күтілетінін ескертті.
