Қазақстанда интернет неге баяулады? Министрлік түсініктеме берді
Мамандар интернет-трафикті резервтік арналарға ауыстырған
Фото: © istockphoto.com
7 маусым күні Қазақстанның бірқатар тұрғыны интернет жұмысының баяулауы мен кей сервистерге кіруде қиындықтар болғанын хабарлады. Осыған байланысты Жасанды интеллект және цифрлық даму министрлігі ресми түсініктеме жариялады, деп хабарлайды Azattyq Rýhy.
Интернеттегі ақауға не себеп болды?
Министрліктің мәліметінше, уақытша іркілістер құрылыс жұмыстары кезінде магистральдық талшықты-оптикалық байланыс желісінің зақымдануынан болған.
Ведомство «Қазақтелеком» АҚ ақпаратына сүйене отырып, құрылыс техникасы халықаралық интернет-трафик өтетін негізгі бағыттардың бірін қамтамасыз ететін кабельді бүлдіргенін хабарлады.
Байланыс толық үзілмеген
Министрліктің мәліметінше, мамандар жағдайға жедел әрекет етіп, интернет-трафикті резервтік арналарға ауыстырған.
Соның арқасында байланыс толық үзілмей, көптеген пайдаланушылар үшін қызметтің жұмысын сақтап қалуға мүмкіндік туған.
Қалпына келтіру жұмыстары жүріп жатыр
Қазіргі уақытта мамандар зақымдалған байланыс желісін қалпына келтіру жұмыстарын жүргізуде.
Министрлік интернеттегі уақытша қиындықтардың техникалық сипаттағы оқиғадан туындағанын және оның жер қазу жұмыстары кезінде байланыс желісінің бүлінуімен байланысты екенін атап өтті.
