Мектептер толықтай жоғары жылдамдықты интернетпен қашан қамтамасыз етіледі
Қазақстанда 8 042 мектептің 7 917-сі интернетке қосылған. Бұл туралы Цифрландыру және аэроғарыш өнеркәсібі министрі Жаслан Мәдиев мәлімдеді.
Фото: Freepik- Қазақстанда 8 042 мектеп бар, олардың 7 917-сі қазірдің өзінде интернетке қосылған. Оның ішінде талшықты-оптикалық байланыс (ТОБ) арқылы – 4 663 мектеп, басқа технологиялар
бойынша 3 254 мектеп (радиорелейлік байланыс – 1 093 мектеп; Starlink – 1 657 мектеп; ADSL – 263 мектеп; LTE-модемдер – 144 мектеп; спутниктік технологиялар – 97 мектеп) қамтылған, - деді Ж. Мәдиев Үкімет отырысында.
Оның айтуынша, аталған 3 254 мектептің ішінен 450 мектепті талшықты-оптикалық байланысқа қосуды жақын арада іске асыруға болады. Өйткені бұл елді мекендерге интернет желі тартылған.
Сондай-ақ, министрлік пен «Қазақтелеком» арасындағы инвестициялар туралы келісім аясында 2 010 мектепке талшықты-оптикалық байланыс жеткізіледі. Бұл тұрғыда 2025 жылы – 819 мектеп, ал 2026 жылы 1 191 мектеп қамтылады. Жобаны іске асырудың қорытындысында барлық мектептерде жоғары жылдамдықты интернет қамтамасыз етіледі.
Бұдан бұрын хабарланғандай, қазір елімізде 267 мың орынға арналған 232 мектеп салынып жатыр.
