Қазақстан мектептерінде жаңа пән пайда болады
Фото: depositphotos.comҚазақстан мектептерінде жол жүру ережесі (ЖЖЕ) жеке пән ретінде оқытылады. Бұл туралы оқу-ағарту министрі Жұлдыз Сүлейменова мәлімдеді, деп хабарлайды Tengri Education.
Министрдің айтуынша, биыл (шамамен 2026-2027 оқу жылында - ред. еск.) Қазақстанда "Қазақстан балалары" бағдарламасы аясында "Жеке қауіпсіздік" атты жаңа пән пайда болады.
"Оған жол жүру ережелерімен қатар балалардың қауіпсіздік мәселелері де кіреді. Пән сабақ кестесіне енгізіледі. Сондай-ақ онда жеке қауіпсіздік және қоғамдық орындардағы қауіпсіздік тақырыптары қарастырылған. Балаларды дайындау қажет болатын барлық өзекті мәселе ескерілді", - деді Жұлдыз Сүлейменова Тәуелсіздік сарайы кулуарында.
Оның айтуынша, бағдарламаны Ыбырай Алтынсарин атындағы Ұлттық білім академиясы мен "Өркен" орталығы әзірлеген. Пәнді педагогтар мен психологтар жүргізеді. Ол 5-9 сыныптар аралығында енгізіледі.
Бұған дейін Жұлдыз Сүлейменова Қазақстанда мектеп оқулықтары мен оқу бағдарламаларының мазмұны жаңартылатынын, оның ішінде жаңа Конституция нормалары мен құндылықтары ескерілетінін хабарлаған болатын.
