Енді дәрі сатып алғанда ЖСН сұрала ма? Қазақстанда жаңа жүйе енгізілуі мүмкін
Қазақстанда медициналық қызметтер мен дәрі-дәрмекке төлем жасау кезінде берілетін кассалық чектерге азаматтардың жеке сәйкестендіру нөмірін (ЖСН) енгізу ұсынылды. Бұл бастаманы Қаржы министрлігі көтеріп, тиісті бұйрық жобасын «Ашық НҚА» порталында қоғамдық талқылауға шығарды.
Не өзгеруі мүмкін?
Жобаға сәйкес, бақылау-кассалық машиналар арқылы төлем жүргізілген кезде чекте міндетті түрде емделушінің ЖСН-ы көрсетілуі ықтимал. Дәрі сатып алу немесе медициналық қызмет алу барысында төлем құжаттары қосымша дерекпен толықтырылады.
Қаржы министрлігі бұл өзгеріс қаржылық операциялардың ашықтығын арттырып, көлеңкелі экономиканың үлесін азайтуға ықпал етеді деп есептейді. Сонымен қатар бұл тетік Әлеуметтік медициналық сақтандыру қоры қаражатының қалай жұмсалып жатқанын нақты бақылауға мүмкіндік береді.
Ресми түсіндірмеде айтылғандай, жаңа жүйе арқылы мемлекеттік кірістер органдары ақпараттық жүйе негізінде чектерді салыстырып, бюджет қаражатының тиімді жұмсалуын қадағалай алады.
Жоба авторларының мәлімдеуінше, бұл жаңашылдық халыққа немесе экономикаға айтарлықтай салмақ түсірмейді. Құқықтық не әлеуметтік тұрғыда да кері әсері болмайды деп күтілуде.
Бұл бастама Үкімет деңгейінде берілген тапсырма аясында қолға алынған. Бұған дейін премьер-министр Олжас Бектенов Әлеуметтік медициналық сақтандыру қорының жұмысын талдап, бірқатар кемшілік анықталғанын мәлімдеген еді. Осыдан кейін қорды Қаржы министрлігінің қарамағына беру туралы шешім қабылданды. Бұл өзгерісті мемлекет басшысы Қасым-Жомарт Тоқаев та қолдап, бюджет қаражаты ең алдымен азаматтардың өмір сапасын жақсартуға бағытталуы тиіс екенін атап өтті.
Құжатты талқылау 2026 жылдың 29 сәуіріне дейін жалғасады. Осы уақыт аралығында кез келген азамат өз пікірін білдіре алады.
