ҚҰМЖИЕК АУЫЛЫНЫҢ АҚСАҚАЛДАРЫ РЕФЕРЕНДУМҒА БЕЛСЕНДІ ҚАТЫСТЫ
Құмжиек ауылында республикалық референдумға ауылдың ақсақалдары бір уақытта келіп, өз дауыстарын берді. Ел ағалары маңызды саяси науқаннан шет қалмай, ел болашағына қатысты таңдау жасап, азаматтық белсенділіктің үлгісін көрсетті.
Ауылдың ардақты қариялары таңертеңнен референдум учаскесіне арнайы келіп, жаңа Конституция жобасына байланысты өз пікірлерін білдірді. Олар мұндай тарихи сәттерде әрбір азаматтың дауысы маңызды екенін айтып, барша тұрғындарды ел тағдырына бейжай қарамай, белсенді қатысуға шақырды.
Ақылман қариялар ел бірлігі мен татулығының маңызын атап өтіп, жас ұрпаққа өнеге боларлық игі іс көрсетті. Құмжиек ауылындағы ақсақалдардың бұл қадамы ел болашағына деген жанашырлық пен жауапкершіліктің айқын көрінісі болды.
