Ел аумағында тұман мен көктайғақ күшейеді: синоптиктер ескерту жасады
29 қаңтарда бірқатар өңірде қар, төменгі боран және қатты жел күтіледі
Фото: istockphoto.com
Фото: istockphoto.com
Қазақстанның бірнеше өңірінде қолайсыз ауа райы сақталады, деп хабарлайды Azattyq Rýhy.
«Қазгидромет» синоптиктері 29 қаңтарда елдің басым бөлігінде тұман, көктайғақ, қар мен желдің күшеюі мүмкін екенін ескертті.
Мамандардың мәліметінше, батыс және солтүстік аймақтарда аздаған қар жауып, төменгі боран соғады. Атырау, Батыс Қазақстан, Қостанай және Солтүстік Қазақстан облыстарында көктайғақ пен тұман жүргізушілер үшін қауіп төндіруі мүмкін. Кей өңірлерде желдің екпіні секундына 15–20 метрге дейін жетеді.
Орталық және шығыс аймақтарда да тұман жиілейді. Қарағанды, Ұлытау, Павлодар, Абай және Шығыс Қазақстан облыстарында көріну қашықтығы төмендеп, жол қозғалысы қиындауы ықтимал.
Оңтүстік пен оңтүстік-шығыста ауа райы да тұрақсыз болады. Алматы, Жетісу, Жамбыл және Түркістан облыстарының таулы және тау бөктеріндегі аудандарында қар жауып, төменгі боран мен көктайғақ күтіледі. Алматы, Қонаев, Тараз, Шымкент және Түркістан қалаларында түнгі және таңғы уақытта тұман түсуі мүмкін.
Синоптиктер тұрғындарды алыс жолға шыққанда барынша сақ болуға, жүргізушілерді жылдамдықты төмендетіп, жол жағдайын ескеруге шақырады. Қолайсыз ауа райы әуе және автокөлік қатынасына да әсер етуі мүмкін.
