Жеке табыс салығы 0%: Салықтан кімдер босатылады

Фото: Ru.freepik.com
2026 жылдың алғашқы он күнінде 66 мың жеке тұлға өз қызметін заңдастырып, өзін-өзі жұмыспен қамтыған азаматтар ретінде жұмысын бастады. Бұл туралы Stan.kz ақпарат агенттігі хабарлайды.
2026 жылғы 1 қаңтардан бастап күшіне енген өзін-өзі жұмыспен қамтығандарға арнайы салық режимі енгізілді. Нәтижесінде аталған тұлғалар бұған дейін жеке кәсіпкер ретінде тіркелмей жұмыс істесе, енді өзін-өзі жұмыспен қамтып, артық әкімшілік рәсімдерсіз заңды түрде еңбек етіп жатыр.

Жаңа салық режимі мына азаматтарға арналған:

Жеке кәсіпкер ретінде тіркелмегендер;
Жалдамалы жұмысшыларды пайдаланбайтындар;
Үкіметтің 2025 жылғы 21 қарашадағы № 994 қаулысымен рұқсат етілген қызмет түрлерімен айналысатындар;
Ай сайынғы табысы 300 АЕК-тен аспайтындар (2026 жылы — 1,3 миллион теңге).
Режимнің негізгі артықшылықтары:

Жеке кәсіпкер ретінде тіркелу міндетті емес;

Жеке табыс салығын төлемейді (ЖТС – 0%);

Әлеуметтік төлемдер бар болғаны табыстың 4%-ына тең
(МЗЖ – 1%, МЗЖЖ – 1%, әлеуметтік аударымдар – 1%, МӘМС – 1%);

Салық есебін тапсырудан босатылады;

Барлық чектер шығарылып, әлеуметтік төлемдер автоматты түрде есептелетін “e-Salyq Business” мобильді қосымшасы арқылы жүргізіледі;

Интернет платформалар арқылы жұмыс істеген жағдайда, чектер мен әлеуметтік төлемдер платформа операторы тарапынан автоматты түрде құралып, ұсталады және аударылады.

Бұған дейін арнайы салық режимін кімдер пайдалана алатыны туралы жазған едік.