Ғалымдар тіл үйрену туралы 5 түсінікті жоққа шығарды
Шет тілін үйрену тек грамматика мен сөз жаттаудан ғана тұрмайды. Ересектердің көбі жаңа тілді меңгеру ұзақ, қиын және тек «қабілеті бар адамдарға» ғана арналған деп есептейді. Бұған көбіне мектептегі қатаң бағалау, қателесуден қорқу және жалықтыратын жаттаулар әсер етеді. Алайда заманауи зерттеулер бұл түсініктердің басым бөлігі шындыққа жанаспайтынын көрсетіп отыр. Бұл туралы The Conversation порталы жазды, деп хабарлайды turkystan.kz.
Тіл білімі саласындағы мамандар адамдардың тіл үйренуді кейінге қалдыруына, тіпті мүлде бастамауына себеп болатын кемінде бес мифті атап өтті.
Бірінші миф – тілді үйрену грамматикалық ережелер мен сөздерді жаттаумен ғана шектеледі деген түсінік. Ғалымдардың айтуынша, тіл – ең алдымен адамдар арасындағы қарым-қатынас құралы. Ол мәдениетпен, тарихпен және күнделікті өмірмен тығыз байланысты. Музыка, фильм, әдебиет немесе ойындарды түпнұсқа тілде түсіну адамның мәдениетаралық икемділігін дамытады. Бұл – өзге мәдени ортадағы адамдармен эмпатия арқылы байланыс орнату қабілеті.
Екінші миф – қате жіберуге болмайды деген қорқыныш. Ресми білім беру жүйесі «дұрыс» және «дұрыс емес» деген ұғымды күшейтсе де, шынайы коммуникацияда қателік – қалыпты құбылыс. Тіпті ана тілінде сөйлейтіндер де жиі жаңылады. Қазіргі коммуникативтік әдістер мінсіз сөйлеуден гөрі, ойды жеткізе білуге басымдық береді.
Үшінші миф – тіл үйрену үшін жас тым үлкен деген сенім. Зерттеулер керісінше нәтиже көрсетеді: бұрын үйренілген тілдер жаңа тілді меңгеруді жеңілдетеді. Ал мотивация – шешуші фактор. Саяхатқа, жұмысқа немесе жеке қызығушылыққа байланысты тіл әлдеқайда тез әрі жеңіл үйреніледі.
Төртінші миф – тілді жалғыз үйрену керек деген ой. Мамандар әлеуметтік ортада оқудың тиімді екенін айтады. Сөйлесу клубтары, онлайн қауымдастықтар, достармен немесе отбасы мүшелерімен бірге оқу – мотивацияны арттырып, нәтижені жақсартады. Көптеген тіл үйрету қосымшалары да оқуды ұжымдық форматта ұйымдастырады.
Бесінші миф – тіл үйрену міндетті түрде көп уақыт пен күш талап етеді деген түсінік. Иә, жүйелілік қажет. Бірақ қазіргі цифрлық құралдар бұл процесті икемді етті. Қысқа сабақтар, ойын элементтері мен күнделікті өмірге бейімделген форматтар артық жүктемесіз білім алуға мүмкіндік береді.
Мамандардың айтуынша, ересек жас – тіл үйренуге кедергі емес. Керісінше, саналы мақсат, өмірлік тәжірибе және заманауи технологиялар оқуды әлдеқайда нәтижелі етеді. Ең бастысы – қателесуден қорықпай, мифтерден арылу.
