Биыл барша қазақстандықтар еліміздің жүрегі Астана қаласының 20 жылдық мерейтойын атап өтуде. Қызылорда облыстық филармониясының «Ақмешіт» фольклорлық ансамблі мен дәстүрлі орындаушылар мерейлі мереке құрметіне арнап «Астана – төрім, ордалы елім» атты концерттік бағдарлама ұсынды.

Сырбойылық өнерпаздар елордалық көрермендерді ән мен жырға, күй мен термеге сусындатты. Сахна шымылдығы ақын Айдос Рахметовтің «Арнауымен» ашылды. Оны елге танымал жыршы Күнсұлу Түрікпен шырқаса, «Мәдениет қайраткері» төсбелгісінің иегері Үміт Медеуова «Ақтамақ», «Бесқопа» және «Қосқаракөз» сынды халық әндерін орындады. Мұнан бөлек, көрермен қауымға жергілікті композиторлардың шығармалары да ұсынылды.

Концертте «Ақмешіт» фольклорлық ансамблі Абылайханның «Қара жорға», Қазанғаптың «Дөңгелек ақжелең» күйлерін, мәңгілік өмір іздеген Қорқыттың «Қоңыр», Шал Мырзаның «Ташауыз» күйлерін өрнектеді.

Мұнан соң сахна төріне жыршылар Ақмарал Ноғайбаева мен Бисенбек Төлеубаев шығып, жыраулық өнердің бірнеше мектебі қалыптасқан сырлы өңірдегі сұлу мақамды әуелетті. Ал ансамбль солисі Эльмира Қалқожаева халық әндері «Ай-қаракөз», «Құрбым-ай», «Әгугайды» «Ақмешіт» фольклорлық ансамблінің сүйемелдеуімен орындады. Осылайша, өнер саңлақтары астаналықтардың қошеметіне бөленді.

– Ару қала Астана шаһарының 20 жылдық мерейтойына Қызылорда облыстық филормаониясынан өзіміздің шағын тобымызбен келдік. Концертіміз 3 блогтан тұрды: жеке әншілер, «Ақмешіт» ансамблінің бағдарламасы және жыршылар блогы. Домбыраның күмбірі мен қобыздың қоңыр үнін сағынған елорда жұртына өнерімізді риясыз жүрекпен ұсындық, – деп ағынан жарылды әнші Үміт Медеуова.

Астаналық көрермендер Сырдың өнерлі перзенттеріне ризашылық сезіммен қол соғып жатты.

syr-media.kz